CEBU, Philippines - Nasikop sa kapolisan sa dakbayan sa Carcar ang gitumbok nga level 4 drug pusher sa maong siyudad atol sa buy bust operation niini didto sa Sitio Awayan barangay Poblacion , sa maong dakbayan niadtong Biyernes sa hapon.
Ang nasikop mao si Conrado Satinitigan, 19, ulitawo nga taga Sitio Lomboy, barangay Liboron, Carcar.
Sayo niini nakadawat og tawag ang kapolisan bahin sa pagpamaligya sa suspek og shabu didto sa maong lugar hinungdan nga nag-umol dayon ang kapolisan og usa ka team nga gipangulohan ni SPO2 Jorame Tanodtanod alang sa pagpahigayon og buy bust.
May usa ka decoy nga nagpakaaron-ingnon nga mopalit og shabu sa suspek sa kantidad nga P200.
Dihang gitunol na sa suspek ang usa ka paketing shabu ug gidawat niini ang markadong P200 , dali kining gipusasan ug dihang girikisa ang iyang mga bulsa didto ang usa ka plastic bag nga gisudlan sa 12 ka gagmay’ng pakite sa shabu.
Lakip nga gisikop sa kapulisan ang motorsiklo kolor itom sa suspek nga maoy iyang gamiton sa pagpamaligya og shabu sa maong lugar.
Ang kapulisan dugay nang nagpaniid sa ilegal nga negosyo sa suspetsado ug gani giisip nila kining level 4 drug pusher.
Ang suspek nagtingkagol na karon sa karsel samtang nagpaabot sa tukmang sumbong nga ipasaka sa kapolisan batok kaniya. (BANATNEWS)