CEBU, Philippines - Wala mapusli ug nanggahi lang ang mga semento ug gipangtay-an ang mga kabilya ingon man ang mga inodoro nga gipang-apod sa kagamhanan sa Probinsya sa Sugbo alang unta sa mga proyekto nga libreng kasilyas sa mga molupyo sa lungsod sa Daanbantayan.
Gibutyag ni Daanbantayan Mayor Maria Luisa Loot atol sa usa ka interbyu sa DyDD nga wala gyud maimplementar ang maong proyekto ni Gob. Gwendolyn Garcia.
Matud pa ni Loot wala mapusli ang maong mga butang tungod kay walay kwarta nga ikagasto ang mga molupyong kabus aron kini matrabaho tungod kay usa lang ka semento, usa ka kabilya ug inodoro ang ipanghatag matag pamilyang walay kasilyas.
Gihimong sanglitanan ni Loot ang mga kabilya nga gipangtay-an nalang ug ang mga semento nanggahi na diha sa barangay Talisay nga gihulagway niyang pag-usik-usik lang sa pundo.
Matud sa mayor gidirekta sa Kapitolyo ang pagpang-apod apod sa maong mga materyales sa mga kapitan sa barangay sukad nga sila nagkabangi sa gobernador.
Si Loot ug Garcia nagkabangi tungod sa giingong pagpangasaba sa naulahi sa mayor tungod sa wala pagsalmot sa Haladaya Festival sa Daanbantayan sa Pasigarbo sa Sugbu.
Gipasidan-an ni Loot ang mga kapitan nga magmatngon ug dili magpataka og dawat sa mga proyekto gikan sa Kapitolyo tungod kay peligro nga sila maoy makiha kun mapakyas pagpatuman niini. (BANATNEWS)