CEBU, Philippines - Gikondenar sa mga kaparian sa Northern Samar ang linuog ug hinayop nga pagpamatay sa walo ka mga polis didto sa barangay Imelda, lungsod sa Catarman, lalawigan sa Northern Samar.
Sa samang higayon ang grupo sa kaparian nga gipangunahan ni Senior Bishop. Most Rev. Emmanuel C. Trance miawhag sa mga New People’s Army (NPA) nga dili unta angayang himoon nila ang maong matang sa linuog ug minanap nga pagpamatay.
Pinaagi sa usa ka Letter of Condemnation nga nadawat sa Banat News, giawhag nila ni Trance ang mga NPA nga ang angay nilang buhaton mao unta ang paghimo og mga diplomatikanhong lakang alang sa malinawong kasulbaran sa ilang suliran ngadto sa gobyerno.
Ang maong suwat sa pagkondenar gihimo ni Trance ug mga kaubanang mga pari human banhigi ug pamatya sila si PSI Nicasio Lavaphie San Antonio, SPO3 Junito T. Julio, SPO1 Juancho M. Esteron, PO2 Marcial E. Velarde, PO2 Marlon G. Estremera, PO2 Rodel Balag, PO1 Edgar C. Catunhay , ug PO1 Arnel Saludario.niadtong Agosto 21, 2010 didto sa barangay Imelda, lungsod sa Catarman.
Gani gikutlo ni Trance ang nahisulat sa Balaang Kasulatan sumala sa mabasa sa Mateo 5:21 nga nagkanayon, “Dili kamo magpatay ug si kinsa mang makapatay kinahanglang manubag niini ngadto sa korte.”
Matud pa ni Trance nga silang mga pari ug ang katawhan sa Samar naghiusa sa pagkondenar sa mga NPA nga mipatay sa maong mga polis tungod kay dili makatarunganon ug dili tawhanon ang maong matang sa krimen.
Sa samang higayon gipadayag ni Trance ug mga kaubanang pari ang ilang kinasingkasing pahasubo ngadto sa tanang kabanay ug kaliwatan sa mga nangamatay nga mga polis. – BANAT NEWS