Milagrosong Birhen gidagsa og tawo

CEBU, Philippines - Giduaw karon sa mga tawo nga naggikan sa nagkalain-laing lugar ang dapit diha sa sitio Estaca, barangay Tunghaan, lungsod sa Minglanilla tungod sa usa ka rebolto sa Birhen Maria nga giingong nagmilagro ug giingong miayo sa mga dunay gihambin nga balatian.

Ang Banat News miduaw ngadto sa maong dapit ug nahinabi ang tag-iya sa maong rebolto nga si Nanay Cornella “Coring” Cono-cono, 55, usa ka mananahi.

Matud pa ni Nanay Coring nga ang unang nagmilagro mao ang iyang estampa sa Birhen Maria ug nahitabo kini niadtong gabii sa Hunyo 23, 2010 diin ang maong estampa hinatag sa Mary’s Little Children Community nga dunay kapilya diha sa barangay Tabunok, Talisay.

Niadtong Hunyo 23, 2010 sa gabii naghungit siya sa iyang 3-anyos nga apo nga si Princess kinsa wala motiwas og kaon tungod kay buot magpakarga sa duyan kay nagreklamo sa sakit sa tiyan.

Ang maong estampa iyang gibutang diha duol sa duyan sa iyang apo ug gisultihan nga bantayan ang iyang apo tungod kay duna pa siya’y tahionon.

Apan nabatyagan niya nga dunay moguroy kaniya nga mobalik ngadto sa nahimutangan sa iyang apo ug dihang iyang gisusi ang bata nahinanok na kini’g katulog sa duyan.

Sumala pa niya ang estampa nga diha sa lamesa giingong daw adunay awra nga mibunlot kaniya nga duolon kini hinungdan nga iyaha kining gipunit ug gipangutana “Mama Mary ania ba ka?”

Nakurat nalang siya nga kalit nga milihok ang estampa o nagtuwang-tuwang paingon sa atubangan maong giusban niya kini og pangutana kun buot ba niining ihilom nalang ang ‘milagro’ nga iyang nasaksihan apan gikatahong mikiling-kiling kini nga sa iyang pagsabot dili kini uyon nga itago ang pagmilagro niini.

Tungod niini iyang gitawag ang iyang anak nga lalaki kinsa nakakita pud nga naglihok-lihok ang estampa.Pagkasunod adlaw gidala nila ang estampa ngadto balik sa kapilya ug ilaha kining gibilin aron ipa-‘healing’ sa pagtuo nga dunay dautang espiritu nga maoy hinungdan nga magkiling-kiling kini.

Pila ka adlaw ang milabay gibalik nila ang maong estampa apan giingong gipasipad-an kini sa ilang gibinlan apan wala usab gipasabot ni Nanay Coring kung unsang klaseha sa pagpasipala ug giilisan sila ni Monsignor Frederick Kriekenbeck og rebolto sa Birhen Maria .

Si Msgr. Kriekenbeck matud ni Nanay Coring maoy magmisahan diha sa nahisgutang kapilya ug giingong misulti ngadto kanila nga ang nahisgutang rebolto gikan kadto sa Roma.

Apan sama sa estampa mokiling-kiling gihapon ang maong rebolto nga kung dili kini uyon mokiling sa kilid ug kung makauyon mokiling sa atubangan.

Human niadtong Hunyo 23, 2010 ang balay ni Nanay Coring giduaw na sa mga tawo gikan sa laing mga dapit aron magpatambal. Misamot og dagsang sa mga tawo dihang ang maong rebolto nabalita sa ABS-CBN News niadtong Huwebes sa hapon.

Matud ni Nanay Coring nga dili siya makamaong manambal sanglit ang Birhen Maria lang maoy mitambal sa mga tawo ug dili usab sila modawat og bayad gawas sa buwak ug kandila nga igasa. – BANAT NEWS