Mamuhatay og paltik sikop

CEBU, Philippines - Nasikop ang usa ka lalaki nga manghimoay og armas atol sa gihimong pagpangronda sa mga sakop sa Criminal Investigation and Detection Group (CIDG)-7 kagahapon sayo sa buntag sa barangay Corte lungsod sa Carmen.

Ang ronda gipangulohan ni Chief Insp. Ricky Neron pinasikad sa search warrant nga giisyu ni Judge Soliver Peras sa RTC branch 10 subay sa kalapasan sa Republic Act 8294 kon illegal possession of firearms nga miresulta sa pagkasikop ni Dindo Castro Pitogo, 39, molupyo sa nahisgutang lugar.

Si Pitogo nakuhaan og receiver ug slide ug hulmahan o tornohan sa paggama sa mga piyesa sa mugbo nga klase sa armas.

Sa interbyu sa mga sakop sa media kang Pitogo walay lipud-lipud kini nga mitug-an nga kapin sa 20 ka tuig na siyang naghimo og armas diha mismo sa ilang pinuy-anan sa Corte.

Gani matud pa niya nga nagsugod siya sa pagpanghimo og armas sa nag edad pa siya og 16-anyos diin ang iyang mga uyoan kaniadto maoy manghimoay og armas hangtud nga nakat-on siya.

Miangkon siya nga mao na kini iyang gibuhi sa iyang pamilya diin matag adlaw mahalinan siya og duha ka mugbo nga klase sa armas nga nagkantidad lamang og P6 mil matag usa niini.

Si Pitogo nagkanayon nga halos tanang mga opisyal sa lungsod ug kapulisan nasayod nga manghimoay siya og armas.

Matud niya nga kasagaran nga mopahimo kaniya og mugbo nga klase sa armas sama sa .45 nga kalibre sa armas mao ang mga sakop sa 78th Infantry Battalion ug mga polis.

Iyang gihimakak nga iya ang maong receiver ug slide kundili ang tag-iya niini mao ang iyang kumpare nga si PO2 Joselito Suerte kay nagpabuhat kaniya og .45 nga kalibre sa armas.

Si Suerte kun kahinumduman nadestino sa Carmen Police station panahon pang Sr. Supt. Carmelo Valmoria apan girelibohan ug gibalhin ngadto sa Camotes island human naeskapohan og piniriso.

Apan siya mihimakak nga didto siya masikop sa ilang pinuy-anan sa Corte kundili didto siya gisikop sa usa ka pribadong tambalanan sa Danao sanglit nagpa Complete Blood Count (CBC) siya sa ikatulo niyang anak babaye kay dunay timailhan nga nasakit kini og dengue.

Si Neron dihang kuhaan unta og pamahayag sa mga sakop sa media nagdumili pagpa-interview ug igo lang mihatag sa iyang cellphone number. – BANAT NEWS