'Hot meat' gisakmit sa DVMF

CEBU, Philippines - Gisakmit sa mga sakop sa Department of Veterinary Medicine and Fisheries (DVMF) Public Health Division ang 3 mil ka mga marinated nga manok gumikan sa kapakyas sa shipper niini pagpakita og meat inspection certificate.

Sa gipadalang pamahayag sa DVMF, si Dr. Alice Utlang ang direktor sa maong buhatan inabagan sa Mambaling Police Station misakmit sa maong mga karne nga giingong gikan sa usa ka Fernando Toledo sa Cagayan de Oro City.

Hinuon dihang gieksamin ang maong mga karne luwas kining kan-on hinungdan nga giapod-apod kini sa dakbayan ngadto sa mga biktima sa sunog sa T. Padilla, Women’s Correctional ug Cebu City Jail Minor’s Dormitory.

Gawas sa maong mga institusyon, gihatagan usab sa maong mga karne ang Missionaries of Charity, Missionary of the Poor Children of the Lamb, Children of Cebu Foundation ug Gasa sa Gugma.

Aron mas luwas ang publiko sa mga karneng ilang mapalit sa nagkadaiyang mga tindahan ug meat shops, ang DVMF padayong nagpahigayon og mga pagbansay-bansay sa mga nagkadaiyang kawani sa mga dagkong tindahan nga namaligya og karne.

Dili palang dugay, mipahigayon ang DVMF og special training alang sa mga tenants ug empleyado sa Metro Gaisano Supermarket aron pagtudlo kanila sa hustong kalimpyo sa mga baligyang karne.

Lakip sa sunod nga ipanudlo mao ang ante-mortem, butchery, sanitation standards and regulations, accreditation of delivery vans and slaughterhouse, post abbatoir handling and meat handling procedure transport and abattoir operations regulations. – BANAT NEWS