2 ka polis naangol kay Citom multicab nadasmag

CEBU, Philippines - Duha ka polis ang na-ospital apil na ang drayber human madasmag sa center island ang multicab sa City Traffic Operations and Management (CITOM) kagahapon sa udto atubangan sa One City Link Terminal sa dalan N. Bacalso Avenue, barangay Pahina Central.

Ang nagmaneho sa CITOM mobile car no. 504 nagtangag sa plakang SHC 942 mao si Calbert Malicay, 30, taga Greenbelt Drive, barangay Quiot ning siyudad nakaangkon og samad sa iyang suwang ug duol sa iyang ilong.

Ang duha ka polis nga naangol mao sila si PO3 Mercedita Carticiano ug PO1 Marlou Gonzales, pulos nadestino sa CITOM ug nagmulo sa kasakit sa ilang tuong bahin sa dughan.

Matud ni PO1 Gonzales nga nahinabi sa Banat News sulod sa Miller Hospital nga gikan sila sa Bulacao nag-roving ug paingon na unta silang mobalik sa buhatan sa CITOM aron maniudto.

Apan pag-abot sa maong lugar kalit lang gidasmag ni Malicay ang sakyanan sa center island.

Matud ni Gonzales tungod sa kakalit sa hitabo wala na siya makabantay kun unsay hinungdan nganong gidasmag ni Malicay ang sakyanan.

Samtang si PO3 Carticiano nga maoy team leader ug naglingkod sa front seat mitug-an sa Banat News nga hinay ra ilang dagan niadtong higayona apan iyang nabantayan nga kalit gibitad ang sakyanan paingon sa center island.

Si Paula Alicaba, traffic enforcer nga nadestino sa maong lugar miingon nga naagian siya ni Malicay ug nangutana pa gani kini kun unsa nang orasa.

Matud ni Alicaba nga iya pang nakita nga hinay rang nagpadagan si Malicay hinungdan nga dili siya makatuong madasmag sa center island.

Si Alicaba nagtuong taw-an ang maong dapit sanglit daghan na kaayong nadisgrasya nga sakyanan sa maong lugar bisan kun walay kontra nga laing sakyanan.

Apan ang mga kauban ni Malicay nagtuo nga gigutom na kini ug posibling nabugnawan ang tiyan nga maoy hinungdan wala na makabantay sa dagan sa sakyanan.

Si Malicay nga maoy nasamad sa maong aksidente gitahi sa mga doktor ang iyang suwang. – BANAT NEWS