CEBU, Philippines - Gumikan sa kabusog ug kahubog, usa ka basurero wala na kamata nga buhi kay giurom sulod sa gikatulgan niyang trak sa basura didto sa sitio Pilipig, barangay Tisa, ning dakbayan sa Sugbo sa miaging hapon.
Ang biktima mao si Mario Pabra Sarmiento, 39, minyo, usa ka basurero sa barangay Tisa, nga nagpuyo sa sitio Tabay Lawom sa maong barangay.
Si Joven Bamvedo Bintayo, 41, minyo , nga maoy kauban sa trabaho sa biktima, ug drayber sa trak sa basura, mibutyag sa kapolisan nga nanambong sila og birthday party sa ilang higala didto sa barangay Inayawan , ning dakbayan nianang udto.
Unya gumikan sa kadaghang pagkaon, matud pa ni Bintayo nga puwerti gyung busoga sa biktima unya nakig-inom sa ilang mga higala busa nahubog usab kini.
Unya kay alas 12:00 man sa kaudtohon, nananghid kaniya ang biktima nga matulog una sulod sa sakyanan ug didto kini mohigda sa atubangang lingkoranan sa trak sa basura.
Nianang pagka- alas 4:00 sa hapon natingala si Bintayo nga wala na niya makita ang biktima busa gisusi niya kini didto sa trak nga gikatulgan niini.
Apan matud pa ni Bintayo nga puwerting kurata niya dihang nakita niya nga wala nay kinabuhi ang iyang kauban.
Busa iya dayong gipadangat ngadto sa kapolisan ang maong hitabo ug dihang gisusi sa kapolisan, nasuta nga wala kini tuyoa og patay ug gituohan nilang giurom kini gumikan kay natulog nga busog. (BANAT)