CEBU, Philippines - Gisalikway ni Gob. Gwendolyn Garcia ang sugyot nga ipaubos sa preventive suspension ang warden sa Cebu Provincial Detention and Rehabilitation Center (CPDRC) nga si Alito Gabuya samtang nagpadayon ang imbestigasyon kalabot sa pagkamatay sa usa ka piniriso ug pagkabun-og sa laing binilanggo tungod sa kagubot sulod sa bilanggoan.
Apan matud pa ni Garcia nga iyang pahulipan si Gabuya sa iyang pagka-warden ug ibalhin og laing assignment gawas sa bilanggoan sa kagamhanan sa lalawigan.
Matud pa ni Garcia nga igo na alang kaniya nga dili makapanghilabot sa operasyon sa CPDRC si Gabuya aron dili kini maka-impluwensiya sa nagpadayong imbestigasyon sa committee on investigation and discipline nga gipangulohan ni Atty. Lito Astelliro.
Samtang gipahibalo sa gobernadora nga ang Kapitolyo nakahatag og ayuda ngadto kang Benjie Undit pinaagi sa pag-abaga sa tanang gastohan sa ospital apil na ang mga tambal sa bun-og tungod sa kagrabe sa kulata nga nahiaguman sa iyang mga kaubang mga inmates.
Gipahibalo usab sa gobernadora nga gisugdan na usab og imbestigar ang 16 ka mga inmates nga maoy gitumbok nga suspek sa pagkamatay ni Angelito Cabalquinto ug pagkabun-og ni Undit.
Dugang pa niya nga andam siya sa laing imbestigasyon nga gihimo sa Commission on Human Rights (CHR) ngadto sa CPDRC basta makig-coordinate lamang kini sa iyang buhatan aron makasulod sa bilanggoan. (BANAT)