Special child gi-rape sa motel

CEBU, Philippines - Nasikop sa kapolisan ang usa ka lalaki nga gipasanginlang milugos sa usa ka 20-anyos nga giingong special child sulod sa usa ka motel sa Mandaue Reclamation Area sa milabay’ng semana.

Ang gidakop mao si “Janjan” (ngalan gipugngan samtang wala pa masang-at ang kaso), 44, residente sa barangay Basak, dakbayan sa Mandaue.

Samtang ang biktima mao si Gina (ngalan gipugngan), dalaga ug special child nga residente sa barangay Labogon sa maong dakbayan.

Base sa reklamo sa mga ginikanan ni Gina uban sa abogado niini nga si Atty. Cristopher Santolorin nga niadtong Agosto 28, 2010 adlaw’ng Sabado gitug-an sa 20-anyos nga si Gina nga gidala siya ni Janjan sa motel ug didto gilugos.

Gumikan niini, gidakop ni Atty. Santolorin si Janjan sa ilang panimalay sa barangay Basak ug gitugyan sa kapolisan sa Station 3 ug gitugyan usab ni PO3 Jose Jamero ngadto sa Station 1 diin ang krimen nahitabo.

Samtang hugot nga gipanghimakak ni Janjan ang alegasyon nga iyang gilugos ang special child sulod sa motel. Matud niya nga wala sila magkauban og panglakaw sa milabay’ng Sabado, Agosto 28.

Gumikan niini, ang Women’s Desk sa kapolisan sa Station 1 sa MCPO pinaagi ni PO2 Erlinda Inot mitug-an nga mihimo na sila og mga pamaagi sa pagpahiling ni Gina ngadto sa pink room sa Vicente Sotto Memorial Medical Center diin ilang gihulat ang resulta niini nga maoy basehan sa pagpasaka og kasong pagpanglugos batok ni Janjan.

Hangtod sa pagsulat ning balita, padayong gitanggong sa selda sa Station 1 sa MCPO si Janjan samtang nagpaabot sa resulta sa eksaminasyon sa biktima. (BANAT)