Priso naghikog sud sa selda

CEBU, Philippines - Wala na makaabot nga buhi sa tambalanan ang usa ka piniriso nga naghikog gamit ang iyang ginisi-gisi nga t-shirt niadtong Martes sa gabii   sulod sa Talisay City detention cell nga nahimutang sa city hall sa barangay Lawaan II.

Ang naghikog mao si Cielo Hernani Bacus, 19, taga sitio Mananga II, barangay Tabunok, Talisay kinsa nag-atubang og kasong kalapasan sa Akta Republika 6539 kon “Anti-Carnapping Act”.

Ang duty jailer niadtong higayona nga si SPO3 Cleofas Bonjoc daling mitawag ngadto sa Talisay City Police Station ug mi-report sa maong hitabo.

Base sa imbestigasyon nila ni Insp. Rio Hugo Ipong ang detention cell dunay unom ka mga gipangdetener karon lakip na niini si Bacus.

Matud ni Ipong nga pipila ka adlaw si Bacus magul-anon kini tungod kay walay miduaw bisan usa sa iyang mga paryente sukad siya natanggong diha sa detention cell.

Ang mga kauban ni Bacus nga mga piniriso kinsa dunay moduaw mao lang ang maghatagan kaniya og pagkaon.

Si Bacus giingong misulti ngadto sa iyang mga kauban nga piniriso nga maghikog apan wala lang kini hatagi og pagtagad sa iyang mga kauban tungod kay nagdahom nga dili kini seryoso sa iyang bahad.

Pasado alas 11 sa gabii niadtong Martes ang mga kauban ni Bacus dunay nabati nga miubo apan wala dayon kini nila panumbalinga apan namatngonan na lang sa mga piniriso nga si Bacus nagbitay na.

Gigisi-gisi ni Bacus ang iyang t-shirt nga iyang gilinubid diin ang pikas tumoy niini iyang gihigot ngadto sa kabilya diha sa kisame ug ang pikas tumoy diha sa iyang liog.

Ang mga kauban ni Bacus daling mitawag og panabang kang SPO3 Bonjoc ug si Bonjoc usab daling misulod ngadto sa karsel ug gitangtang ang higot sa li-og ni Bacus human matangtang ang higot mitawag ngadto sa Talisay Rescue Emergency Action Team (TREAT) ang maong polis.

Si Bacus gidala ngadto sa Talisay City District Hospital apan wala na kini makaabot nga buhi sa maong tambalanan.

Si PO1 Jundave David nga nahinabi sa Banat News kagahapon mibutyag nga si Bacus nasikop niadtong Agosto 25, 2010 tungod sa giingong pagpanagit niini og motorsiklo diha sa parking area sa merkado publiko sa barangay Tabunok.

Ang maong motorsiklo gipanag-iya ni Wenmark Sara, 29, taga barangay Lower Pakigne, lungsod sa Minglanilla.

Ang maguwang ni Wenmark nga si Ulysses Sara maoy nakasikop kang Bacus ug ang suspetsado gitugyan niini ngadto sa mga polis.

Atol sa maong hitabo si Bacus dunay laing kauban nga si Witnes Labiaga kinsa nakaikyas apan lakip nga gipasakaan og kasong kalapasan sa Akta Republika 6539 diha sa Talisay City Prosecutor’s Office niadtong Agosto 26, 2010.

Si PO1 David mibutyag usab nga base sa ilang nahipos nga report si Bacus sakop kini sa Crips gang ug nalambigit usab og pagpanglabni apan walay mga reklamong biktima niini sa pagpanglabni.

Ang patay’ng lawas ni Bacus gidala diha sa St. Francis Funeral Homes sa barangay Bulacao, Talisay ug hangtud sa oras sa pagsuwat niining balita wala pay mga paryente niining mipakita. (BANAT)