CEBU, Philippines - Gipahigayon ang diyalogo kagahapon tali ni Mayor Michael Rama ug sa mga sakop sa Cebu City Vendors Association atubangan sa Cebu City Hall diin giyagyag sa maong grupo ang ilang pagsupak sa pagpirma sa “affidavit of undertaking” nga nagkauyon silang pwede silang palayason gikan sa ilang mga pwesto diha sa Carbon Market kun gustohon sa dakbayan.
Ang gireklamo sa mga sakop sa CCUVA ang maong probisyon sa affidavit tungod kay gilainan sa tonada niini nga daw nagbutang hinuon sa kawalay seguridad sa ilang panginabuhian diha sa maong merkado tungod kay mahimo lang silang palayason kun gusto nang gamiton sa dakbayan ang ilang lugar.
Hinuon pipila sa mga polisiya sa siyudad ang ilang gisunod sama sa ilang mga ID ug ang pag-comply sa voter’s certificate aron pagmatuod nga sila mga residente gyud sa dakbayan.
Usa sa mga kamandoan nga kinahanglan nga sul-ubon kanunay sa vendors ang ilang ID aron presentable kini nga lantawon. Hinuon ang market administrator nga si Racquel Arce mipadayag nga kung mopirma ang mga vendors sa affidavit of undertaking kini mopalig-on sa ilang seguridad sa panginabuhian.
Matud pa ni Arce nga pinaagi niini dali rang mailhan kun si kinsa ang mga ilegal nga mga vendors diha sa Carbon.
Tungod sa protesta sa mga vendors mipasalig si Rama nga adunay usbon sa maong affidavit of undertaking partikular ang mga probisyon nga nakapahulga sa mga vendors.
“Importante sa tanan ang responsibilidad, dili kay ang katungod ra ang huna-hunaon,” nagkanayon ang mayor agi og pagpasabot sa responsibilidad sa matag vendors.
Pipila sa mga sakop sa CCUVA ang mipadayag nga nasayod sila nga ang kagamhanan sa siyudad maoy tag-iya sa ilang mga pwesto apan gusto nila nga ipaagi ang mga kasabutan tali sa siyudad ug kanilang mga vendors sa tawhanong paagi. (BANAT)