Gloria Diaz i-ban sa Cebu

CEBU, Philippines - Ang bag-ong mga opisyal sa Vice Mayors League of the Philippines Cebu Chapter miluwat dayon og resolusyon nga nagdeklarar kang Miss Universe 1969 Gloria Diaz nga persona non grata tungod sa pagsaway niini sa mga Cebuana nga dili maayo og English. Sumala pa sa bag-ong mihurar nga mga opisyal sa liga, pinaagi sa presidente nga si Bise Mayor Arlene Zambo sa Toledo city nga human sa ilang oath-taking kagahapon atubangan ni Gob. Gwendolyn Garcia mihimo sila og sesyon ug ilang gipasar ang resolusyon.

Si Zambo nagkanayon nga ang tanang mga bise mayor sa kalungsuran nagkasabot nga mopasar og resolusyon nga nagdeklarar kang Diaz nga persona non grata, mikondena sa iyang iresponsableng pamahayag ug midemanda og public apology gikan niya.

Gawas niini, si Zambo miingon nga ang ilang resolusyon nag-ban usab kang Diaz sa pag-anhi sa Sugbo kay dili man usab kini ganahan sa mga Sugbuanon.

Nanawagan usab sila sa tanang mga Cebuano dili lamang dinhi sa lalawigan sa Sugbo lakip na sa mga nagpuyo sa laing mga lugar sa nasud sa Pilipinas ug sa gawas sa nasud nga i-ban usab ang tanang mga salida ni Diaz, lakip na ang tanang mga produkto nga gi-endosar niini.

Matud pa ni Zambo mao kini kusog nga pagpakita sa panghimaraot sa mga Sugbuanon ngadto kang Diaz tungod sa pagyagayaga niini sa mga Sugboanon.

Si Garcia sa iyang bahin misuporta sa resolusyon sa liga.

Gihulagway ni Garcia si Diaz nga walay kasingkasing. Iya usab nga gihinganlan si Diaz nga wala sa hunahuna ug walay tarong pangisip sa pagbungat og komentaryo batok sa mga Sugbuanon.

Uyon usab ang gobernadora nga dili na patumbon sa Sugbo si Diaz, pag-ban sa mga salida ug produktong gi-endosar niini.

Paluyohan usab sa gobernadora ang resolusyon ni Bokal Agnes Magpale nga nagkondenar kang Diaz ug nagdemanda og public apology.  (BANAT)