CEBU, Philippines - Patay na nga napalgan sa usa ka mananagat kagahapon sa buntag diha sa kalawran sa Kwaming, isla sa Bohol ang 8-anyos nga batang lalaki nga naanod sa baha uban sa iyang lola ug duha ka igsuon sa milabay’ng adlaw sa bukirang bahin sa sitio Cabu-an, barangay Cogon, lungsod sa Naga. Si Federico Hoybia, 58-anyos taga barangay Tanke kinsa managat unta ngadto sa nahisgutang dapit maoy nakabangal kang Renier Paran, taga barangay West Poblacion, lungsod sa Naga.
Ang amahan ni Renier nga si Crisanto Paran kinsa gitawagan sa kapolisan miadto sa headquarter sa Fishermen Sea and Ecological Care (FISECA) sa barangay Cansojong, Talisay diin ang patay’ng lawas sa bata unang gidala. Si Crisanto miila nga ang batang nabangalan ni Hoybia mao ang iyang anak nga naanod.
Si PO1 Jundave David sa TCPS sa pakighinabi niini sa Banat News nagkanayon nga si Hoybia sakay sa iyang pumpboat ug naabot ngadto sa kalawran sa Kwaming mga alas 10 sa buntag kagahapon.
Matud ni David nga dunay nakita si Hoybia nga naglutaw diha sa dagat hinungdan nga iyaha kining giduol ug nasuta nga bata kini nga nagkulob.
Gihulagway ni David nga ang lawas ni Renier mibutod na ug paingon nang madugta ug wala na kini sapot.
Gituohan nga ang sapot sa bata nagisi-gisi kini ug nahubo tungod sa kakusog sa bul-og sa tubig sa baha nga mianod kanila.
Si Hoybia daling mibalik ug mideretso kini ngadto sa buhatan sa FISECA ug gitaho ang maong insidente.
Ang FISECA una miadto sa lugar diin napalgan ang patay’ng lawas ni Renier mi-report kini sa kapolisan.
Si David uban nila ni PO3 Alfredo Cuison, PO2 Henry Mata ug PO1 Rusty Pelayo daling mitubag sa maong report ug miadto sa headquarter sa FISECA.
Ang patay’ng lawas ni Renier gikarga sa mga sakop sa FISECA sa ilang pumpboat balik ngadto sa kabaybayonan sa Cansojong.
Ang patay’ng lawas ni Renier gidala dayon sa iyang amahan ngadto sa Mountain View Funeral Homes sa Naga.
Kahinumduman nga ang maguwang ni Renier nga si Kris Paran, 13, patay na nga napalgan sa milabay’ng hapon ngadto sa sitio Crusher, barangay Guindarohan, lungsod sa Minglanilla.
Ang 12-anyos nga maguwang usab ni Renier nga si Renan Paran ug ang ilang lola nga 55-anyos nga si Agripina Paran naluwas sa maong hitabo.
Si Agripina mibutyag sa mga polis nga siya ug ang iyang mga apo mitabok sa sapa paingon ngadto sa iyang balay sa sitio Cabu-an, Cogon apan kalit lang mibundak ang kusog nga uwan hinungdan nga mibaha ang sapa ug nangaanod sila. (BANAT)