'Hate crimes' vs Pinoy di tinuod

Walay kamatuoran ang nanggawas nga mga report nga misulbong ang mga insidente sa ‘hate crimes’ batok sa mga Filipino didto sa nasud sa Hong Kong tungod sa nahitabong hostage-taking sa Manila niadtong milabay’ng semana.

Si Philippine Consul General sa Hong Kong nga si Claro Cristobal mihimakak sa maong mga report ug nanawagan sa publiko sa paghunong na sa pagpadala og mga text messages nga nag-ingong adunay mga Overseas Filipino workers (OFWs) sa Hong Kong nga gipangkulata ug giabuso tungod sa gidangatan sa walo ka turistang taga Hongkong nga namatay sa maong hostage taking.

Sa report sa ABS-CBN News, si Cristobal dihang giinterbyu sa Radyo DZMM mibutyag nga kadaghanan sa mga text messages nga gipasa-pasa sa mga OFWs sa Hong Kong Special Administrative Region (SAR) dili mga berepikado.

Ang labing uwahing giingong nahitabong ‘hate crime’ nga gipasa-pasa pinaagi sa text message mao ang usa ka Filipino nga turista ang gisabliga’g asido sa usa ka taga Hong Kong.

Dihang gisubay sa konsulada sa Pilipinas diha sa Hong Kong police walay panghitabong natala nga susama niini.

“Walang ganoon pangyayari, [iyong mga na-report ay] random at biglaan. Kahuli-hulihan na incident, nadakip ang perpetrators. ‘Yong ang hinihiling na sa ating mga kababayan dito, na huwag mag-react sa mga rumors,” panawagan pa niini.

Samtang nanawagan si Cristobal sa mga turistang Filipino nga nagplanong mosuroy sa Hong Kong nga dili nalang mohinayon kun paminaw nila dili sila luwas sa maong nasud.

Giklaro hinuon ni Cristobal nga pabiling luwas ug malinawon ang Hong Kong gumikan kay kasaligan ang ilang kapulisan ug padayon ang ilang kagamhanan sa pagpahimangno sa ilang mga tawo nga ipatigbabaw ang kalinaw ug pagka-kalmado.

Giangkon hinuon niyang nagpabilin gihapon ang kapungot sa mga taga Hong Kong sa nahitabo apan wala nila kini gipaagi sa pagpanakit sa uban.

Samtang ang embahada sa Pilipinas diha sa United Kingdom mipahibalong wala did-i sa ilang gobiyerno ang ilang mga molupyo nga makabisita dinhi sa Pilipinas bisan pa sa nahitabo.