Gidunggab sa silingan kilay samdan

CEBU, Philippines - Samdan ang kilay sa usa ka lalaki dihang giluba kini sa iyang silingang mananagat didto sa sitio Parola, barangay Ibo, dakbayan sa Lapulapu sa miaging gabii.

Ang biktima mao si Leo Baterna, 25 , nga nagpuyo sa maong dapit samtang ang suspetsado nailhan usab nga si Regie Estellore, 40, mananagat nga iya ra usab nga silingan.

Si PO3 Dioscoro Arong sa homicide section sa kapolisan sa maong dakbayan miingon nga naglakaw ang biktima sa dalan sa ilang lugar kauban ang iyang kapuyong babaye, dihang nasugatan nila ang suspetsado.

Apan matud pa sa biktima nga walay daghang estorya ang biktima nga nagbitbit nang daan og kutsilyo kalit nga midasmag kaniya dungan ang pagluba kaniya.

Apan gumikan sa iyang kaigmat, gilihayan niya ang kutsilyo apan nakadlitan gyud ang iyang kilay ug nasamad kini.

Unya giusban na usab siya og dunggab , apan iya kining nasagang ug nailog ang kutsilyo.

Ang biktima daling nakapangayo og tabang sa mga tanod sa barangay , hinungdan nga nasikop dayon ang suspetsado.

Gibalhog sa prisohan ang suspetsado samtang gisang-at na usab sa biktima ang tukmang sumbong batok niini.

Wala pa usab masuta kun unsay nasuk-an sa suspetsado ngadto sa biktima. (BANAT)