Karaang mga building papintalan downtown area subling 'nindoton'

CEBU, Philippines - Giawhag ni Mayor Michael Rama ang mga negosyante sa dakbayan nga ipabilin ang kalimpiyo sa ilang palibot ug kanunayon ang pagpanindot sa ilang mga establisamento isip kabahin sa Downtown Revitalization Program sa kagamhanan sa siyudad.

Partikular nga mga negosyanteng giawhag ni Rama mao ang mga naninda diha sa dalan Colon, V. Gullas (kanhi Manalili), Freedom Park ug Carbon Area.

Buot ni Rama nga kadtong mga karaan na kaayong mga building nga nangapakpak na ang mga pintal kinahanglang pintalan og bag-o ug hipuson ang mga basura sa palibot niini.

Sa pagkakaron daghang mga karaang buildings diha sa maong mga dalan nga padayon pang gigamit alang sa komersyo.

Lakip sa plano ni Rama mao ang plano niining paghimo og marine museum diha sa Campana Maritama building tabok sa Cebu City Hall nga kaniadto usa sa mga commercial buildings sa dakbayan panahon sa Amerkano.

Moduol unya ang mayor sa nagkadaiyang mga organisasyon aron ikatambayayong sa pagpalambo sa downtown area.

Samtang makigtigom usab si Rama sa mga kadagkoan sa   Cebu Port Authority alang sa plano nga pagpanindot sa reclamation area sa siyudad ug ang planong pagtukod sa “fisherman's wharf” sa South Reclamation Properties (SRP) nga makahatag usab og positibong imahe sa industriya sa turismo dinhi sa siyudad.

Sa laing bahin, si Konsehal Margot Osmeña miawhag sa publiko nga magtinabangay sa pagpanglimpiyo sa siyudad ug buot niyang kini anha palang sa panimalay sugdan na sa mga Sugbuanon.

Matud pa ni Osmeña nga importante kaayo nga matag panimalay nga duna gyu’y basurahan . 

Aminado siya nga pirmeng suruyan sa mga turista ang siyudad sa Sugbo ug kung limpiyo ang usa ka lugar makaabag usab kini sa dagan sa turismo. (BANATNEWS)