Sa kamatayon sa inmate ug pagpangulata warden sa CPDRC imbestigahon

CEBU, Philippines - Sugdan na sa buhatan sa gobernadora sa lalawigan sa Sugbu ang pag-imbestigar sa jail warden sa Cebu Provincial Detention and Rehabilitation Center kon CPDRC may kalambigitan sa nahitabong pagpamun-og sa duha ka mga piniriso nga miresulta sa kamatayon sa usa samtang nalandig sa tambalanan ang usa.

Matud pa ni Atty. Lito Astelliro, pangulo sa Committee on Discipline and Investigation sa Kapitolyo buot ni Gob. Gwendolyn Garcia nga imbestigahon si CPDRC Jail Warden Alito Gabuya karong semanaha pinaagi sa pagpatawag niini.

Buot nilang hatagan og higayon nga matubag ni Gabuya ang mga pangutana kalabot sa pagkamatay sa pinirisong si Angelito Cabalquinto ug sa pagkalandig sa tambalanan ni Benjie Undit. Gikatahong adunay nahitabong kagubot sa sulod sa maong bilanggoan nga miresulta sa pagpangulata sa duha.

Mitumaw sa mga report gikan mismo sa kanhi security consultant sa Kapitolyo ug igsuon ni Garcia nga si Byron Garcia nga ang pagpangulata nagsugod gumikan sa pagpamugos sa pagpasayaw sa mga inmates.

Ang CPDRC inmates misikat na sa tibuok kalibutan gumikan sa mga pagsayaw niini nga mihakot og mga turista ug naila diha sa internet. Kini nahitabo dihang si Byron pa maoy pangulo sa maong bilanggoan.

Sa nahaunang report, wala motug-an si Gabuya kabahin sa kagubot kondili kini mibutyag nga natagak si Cabalquinto samtang nanghayhay og sinina ug patay na kini paghidangat sa tambalanan. Gipahibawo usab ni Astelliro nga ila usab karon tun-an kun angayan bang ipaubos sa usa ka preventive suspension si Gabuya samtang nagpadayon ang ilang imbestigasyon.

Sa iyang bahin, si Gabuya miingon nga andam siya nga mopailawon sa imbestigasyon ni Garcia bisan pa man og may preventive suspension.       

Padayon siya nga miinsister nga wala siyay nakitang kasaypanan sa maong insidente ug aksidente lamang gyud ang nahitabo sa maong pinirisong nakalas. Samtang gitumbok ni Astelliro nga nasugdan na usab ang pagpahugot sa seguridad sa sulod sa CPDRC pinaagi sa pagpahigayon sa roving sa jail guards, istriktong pagrekisa sa mga bisita ug uban pa.

Dugang pa niini nga ang ilang imbestigasyon molanat pa og pipila ka semana depende lamang sa gidaghanon sa mga testigos nga makuha aron masuta gyud kun si kinsa ang angayan nga manubag sa kamatayon ni Cabalquinto ug pagkabun-og ni Undit. (BANATNEWS)