Drayber wa kamata giurom

CEBU, Philippines - Usa ka drayber sa traysikol wala na makamatang buhi ug gikatahapang urom ang hinungdan sa iyang kamatayon sulod sa balay sa usa ka barangay tanod didto sa sitio Buhisan Proper, barangay Buhisan ning dakbayan sa Sugbo sa miaging kaadlawon.

Ang biktima nailhang si Dioscoro Maraviles Pasomala, 50, minyo, drayber sa traysikol nga lumad nga taga sitio Tubod, barangay Dunggoan, lungsod sa Dumanjug. Si Edward Magellan, 39, drayber usab sa traysikol maoy mipukaw sa biktima nga naghigda sa ikaduhang andana sa balay ni Edwin Bercide, usa ka barangay tanod.

Apan matud pa ni Magellan nga sa nadugay niyang kuhil-kuhil sa iyang tiil sa lawas sa biktima, iyang namatikdan nga bugnaw na kini ug gahi na kaayo.

Dihang iyang gisil-ing nadiskobrehan niyang patay na kini. Ang kapolisan nga maoy misusi sa lawas sa biktima, mikompirmar nga wala kini patya og tuyo apan gidudahang giurom.  (BANATNEWS)