Gipatay sa Brgy. Sto. Niño nailhan na

CEBU, Philippines - Nailhan na sa kapolisan ang usa ka lalaking gipusil diha sa iyang ulo sa wala mailhing mamumuo diha sa dalan D. Jakosalem sa barangay Sto. Niño ning dakbayan alas 2:30 sa miaging adlaw.

Ang biktima giila sa mga kabanay nga mao si Roberto “Cholo” Gimenez, 33, usa ka traysikad driver ug molupyo sa sitio Bugnay sa barangay Labangon ning siyudad.

Sa imbestigasyon sa kapulisan, ang biktima wala nay kinabuhi dihang ilang naabtan nga nagluhod ug may pinusilan sa tuong bahin sa ulo nga milapos sa ubos sa walang dunggan nga nakaingon sa hinanali niining kamatayon.

Sa imbestigasyon sa kapulisan, ang biktima naglingkod daplin sa aseras sa nahisgutang lugar dihang kalit nga giduol sa mamumuno ug sa walay igong hinungdan gipusil gamit ang kalibre .45 nga armas diha sa iyang ulo.

Human sa hitabo milakaw ang mamumuno sa sudlonong bahin sa sitio Lutaw-lutaw sa barangay Sto. Niño ug wala na igkita sa mga polis.

 Si Raffy Dakay, 34, kawani sa General Service Office diha sa Cebu City Hall mibutyag sa kapolisan nga iyang gibayran ang biktima og P100 aron siya kuyogan sa maong dapit aron siya mangutang og kwarta sa usa ka lending firm.

Matud pa niini nga naniudto pa sila sa usa sa mga kan-anan sa maong dapit una siya milakaw ug gipapaabot ang biktima samtang siya misulod sa sitio Lutaw-lutaw aron unta mangutang. Apan sa iyang pagbalik patay na kini.  (BANATNEWS)