CEBU, Philippines - Gilapsan sa usa ka bala ang paa sa usa ka tawo human kini pusila sa wala hiilhing kriminal nga didto manukad sa silong sa balay sa biktima sa sitio Albor, barangay Liburon, dakbayan sa Carcar sa miaging kaadlawon.
Ang biktima nailhang si Rogelio Manayaga, 48, minyo nga taga Carcar.
Sumala sa kapolisan sa Carcar Police Station nga nahinanok pag-ayo sa katulogon ang biktima dihang wala kini kalibotan nga may buot mopatay kaniya nga misuong sa ilang silong ug didto gibirahan siya sa pagpusil.
Matud pa nakahigayon sa pagpusil ang kriminal kay kawayan ang sawog sa balay sa biktima apan malagmit gumikan sa nagkurog nga kamot, imbis ulo ang target, ang tuong paa sa biktima maoy nasabak.
Gihatod dayon ngadto sa Carcar District Hospital ang biktima samtang misibat usab dayon ang kriminal ug wala kini hiilhi hangtod sa pagkakaron. (BANAT NEWS)