CEBU, Philippines - Gikataw-an ni Gobernador Gwen Garcia ang pagkuha og usa ka consultant ni Bise Gobernador Gregorio Sanchez alang sa iyang mga proyekto.
Kini tungod kay matud pa sa gobernador nga walay kapuslanan ang pagkahimong consultant sa negosyanteng si Crisologo Saavedra tungod kay wala kini kontrataha sa Kapitolyo.
Matud pa ni Garcia nga kun may kontrata man ang pagkahimong consultant ni Saavedra, walay laing mopirma niini gawas kaniya nga gobernador base sa local government code.
Hinuon matud pa sa gobernador nga kun personal nga gikontrata ni Sanchez si Saavedra aron ika-promote sa liquid fertilizer sa bise gobernador dili siya manghilabot niini.
Apan dili usab mahimo nga si Saavedara himoong consultant sa Kapitolyo sama kang Capitol Consultant on Information Rory Jon Sepulveda sanglit dili legal ang iyang pagkatudlo sa katungdanan.
Busa gipahimangnoan sa gobernador si Saavedra nga magmatngon sa iyang mga lihok kay kun maligas kini sa pagpresentar sa Kapitolyo manubag siya. – BANAT NEWS