CEBU, Philippines - Samdan sa kilid nga bahin sa lawas ang usa ka lolo human kini lubaa sa iyang silingang ginganlan niya og kawatan didto sa Sunshine Valley, barangay Quiot, ning dakbayan sa Sugbo sa miaging gabii.
Ang biktima mao si Dominador Caponpon, 61, nga taga Quiot, samtang ang suspetsado mao usab si Judie Balanga, 21, nga silingan sa biktima.
Ang biktima miasoy ngadto sa kapolisan nga nagtindog siya duol sa ilang balay dihang mikalit lang pagduol kaniya ang suspetsado ug walay daghang langas, gidunggab ang iyang tuong kilid.
Matud pa sa biktima nga nagtuo siya nga gikayugot sa suspetsado ang iyang pagkasaba niini sa miaging adlaw gumikan sa bisyo nga pagpangawat.
Ang biktima didto mobutyag sa kapolisan sa Cebu City Medical Center diin siya dad-a human siya lubaa sa suspetsado
Samtang padayon pang gipangita sa kapolisan ang suspetsado kinsa nakasibat human sa hitabo. – BANAT NEWS