Gipokpok sa bato ulo sa panday nabuslot

CEBU, Philippines - Nabuslot ang bagolbagol sa usa ka panday human kini pusposi og bato sa iyang kauban sa trabaho nga iya usab nga kainom didto sa sitio Sudlon, barangay Lahug ning dakbayan sa Sugbo sa miaging gabii. Ang biktima mao si Gandy Magtanao Villacrusis, 33, minyo ug usa ka construction worker nga taga Lahug.

Samtang ang suspetsado mao usab si Juan Paulo Acaw, kauban niya sa pamanday ug silingan usab.

Nasayran nga ang biktima ug ang suspetsado may gitambungan nga salo-salo sa ilang silingan ug nagkasabot silang mag-inom.

Apan dihang nangalasbag na, giingong nagsugod na ang panaglalis sa duha nga misangpot sa ilang pagsinumbagay.

Ang suspetsado kinsa giingong gilupig sa sinumbagay, mipunit og dakong bato ug maoy gipokpok sa ulo sa biktima.

Gumikan sa kakusog sa pagkapuspos, mibuhagay ang daghang dugo gikan sa bagolbagol sa biktima gumikan sa giingong pagkalungag niini agi sa bato.

Nadala sa tambalanan ang biktima samtang ang suspetsado gipangita pa sa kapolisan human kini mosibat.  – BANAT NEWS