CEBU, Philippines - Usa ka lalaki napalgang wala nay kinabuhi sa usa ka barong-barong sa Sitio Paglaum, Barangay Bulacao, ning dakbayan sa Sugbo sa miaging udto kinsa gituohang namatay gumikan sa iyang balatian sa lawas.
Ang patay’ng lawas giila nga si Gregorio Dicdican, 57, ulitawo, ug usa ka panday nga kasamtangang nagpuyo sa maong dapit, apan lumad nga taga Dalaguete ug walay kauban sa balay.
Nasayran nga usa ka drayber sa traysikad nga si Efipanio Bautista Masangkay, 35, nga nagpuyo sa maong lugar maoy nakakita kang Dicdican nga nagbuy-od sa sawog sa iyang payag nga wala nay kinabuhi.
Si Dicdican giingong daan nang nag-antos sa iyang sakit nga kidney. Gituohan nga namatay si Dicdican gumikan sa iyang sakit. – BANAT NEWS