Loot mihimakak sa pasangil

CEBU, Philippines - Gipanghimakak ni Mayor Maria Luisa Loot sa Daanbantayan ang pasangil sa Kapitolyo nga iyang gibabagan ang delivery sa Provincial General Services Office (PGSO) sa 500 ka mga toilet bowl alang sa mga molupyo sa barangay Baterya sa maong lungsod.

Matud pa ni Loot nga walay basehanan ang pasangil sa suspendidong kapitan nga si Arcenio Luciano.

Sayo niini nanabi si Luciano nga matud pa gimandoan ni Loot ang kapolisan sa pagbabag sa maong delivery unya gipauli ang maong mga toilet bowl ngadto sa Kapitolyo.

Iyang gitataw nga klaro kaayong binuhatan kini sa iyang mga kontra sa politika busa dili niya ikatingala nga padak-on kini sa Kapitolyo ilabi na karong gikasangka na niya si Gobernador Gwen Garcia.

"Ang mga tawo na lamang ang atong pasultihon kinsa ang nagtug-an sa tinuod,"sigun pa ni Loot sa interview sa DyRF.

Samtang gitataw ni Loot nga dili unta angayan nga hatagan og bulok politika sa gobernadora ang paghatag sa dakbayan sa Sugbo og tunga sa milyon ka pesos nga pundo alang sa Daanbantayan.

Kini tungod kay dili man kini niya gamiton sa personal kun dili alang sa ikalipay sa iyang mga tawo sa lungsod gumikan sa kalampusan sa Haladaya Festival.

Tungod usab sa hinabang ni Mayor Mike Rama sa dakbayan sa Sugbo, mihimo siya og panaad nga dili na gyud siya mopalta pa sa pag-apil sa Sinulog matag tuig. – BANAT NEWS