P500 mil para D'bantayan gisupak

CEBU, Philippines - Wala usab makauyon si kanhi senador Sony Osmeña sa desisyon ni Mayor Michael Rama nga mohatag og tunga sa milyon ka pesos ngadto sa lungsod sa Daanbantayan alang sa Haladaya Festival.

Matud pa ni Osmeña sa interview sa DyRF nga dili maayong ipanghatag ang kuwarta sa siyudad sa Sugbo ngadto sa laing lugar ilabi na ngadto sa kalungsuran kay iya man kini sa hurisdiksyon sa probinsiya.

Si Osmeña nagkanayon nga kataw-anan kaayo nga mohatag og pundo ang siyudad ngadto sa laing lugar apan ang mga mulupyo sa siyudad nagsige og pangayo og tabang kay nagkulang ang pundo alang sa serbisyo ngadto sa mga botante sa Cebu City.

Gitambagan sa kanhi senador si Rama nga angayan untang unahon niini ang pag-atiman sa naputol nga burial assistance sa katawhan sa Sugbo ug uban pang benepiyso nga wala na matarong sa pagpatuman karon nga bag-o na ang mayor.

Dugang pa niini nga angayan usab untang unahon sa pag-atiman ni Rama ang kadako sa utang sa siyudad. – BANAT NEWS