Leo Lastimosa mi-bail
CEBU, Philippines - Hingpit nga nakapiyansa ang beteranong komentarista ug anchorman sa ABS-CBN Central Visayas ug station manager sa DyAB radyo nga maglilindog dinhi sa The Freeman ug Banat News nga si Leo Lastimosa sa kasong libelo nga gipasaka sa kapitolyo batok kaniya. Ang warrant of arrest sumala pa sa report sa TV Patrol Central Visayas kagahapon pormal nga migawas alas-3 kagahapon hinungdan nga miadto si Lastimosa sa Fuente Osmeña Police Station ug gipa-blotter ang pagtahan niini sa kaugalingon.
Kinuyogan ni Sr. Insp. Michael Bastes, hepe sa Fuente Police Station ug abogado ni Lastimosa mipiyansa kini ngadto sa korte ug temporaryong nakagawas kagahapon.
Una na niini, gikasagmuyo ni Regional Trial Court kon RTC-7 Branch 14 Judge Rafael Yrastorza ang paggawas sa balita kabahin sa warrant of arrest batok sa maong magsisibya nga gikatakdang mogawas kagahapong adlawa. Matud pa sa abogado ni Lastimosa nga si Atty. Celso Espinoza nga ang ilang nahibaw-ang rason mao nga gikinahanglan pa unang tun-an sa huwes ang pag-isyu og warrant of arrest alang kang Lastimosa.
Sigon pa niini nga usa sa mga staff sa sala ni Yrastorza ang nabalaka karon nga mag-atubang og administratibang imbestigasyon tungod sa pag-leak og impormasyong ipagawas na ang warrant of arrest batok ni Lastimosa kagahapon.
Si Lastimosa sa iyang bahin sa sayo pa nagkanayon nga nagduda siya sa ‘timing’ sa paggawas sa maong warrant of arrest tungod kay adlaw mang Biyernes ug posibleng kini himuon sa hapon aron lang siya di makapiyansa ug makahigda gyud sa bilanggoan sulod sa pipila ka adlaw ilabi na nga non-working holiday sa adlaw nga Lunes.
Sa iyang bahin, si Capitol Consultant on Information Rory Jon Sepulveda nagkanayon nga ang katuyuan sa pagpasaka og kasong libelo batok ni Lastimosa dili aron pagpahilom niini sa pagsibya.
Kondili igo lamang kining misubay sa legal proseso tungod sa ilang pagtuo nga pagsibya ug pagkamaglilindog sa pamantalaan ni Lastimosa batok kang Gob. Gwendolyn Garcia nakalapas na sa balaod diha sa iyang lindog nga nag-ulohan og "Si Doling kawatan." – BANAT NEWS
- Latest
- Trending
