CEBU, Philippines - Maayong pagkalupad sa usa ka lalaki ug mitugpa sa kongkretong dalan ug namatay human ang motorsiklo niini gisungag sa usa ka ambulansyang naghatod og pasyente pasado alas-12 sa udto sa miaging adlaw sa national road sa barangay Sabang syudad sa Danao.
Ang biktima nailhan nga si Levi Pumar Bingtan, taga Tag-ube lungsod sa Compostela kinsa patay nang miabot sa tambalanan sa Danao District Hospital.
Base sa imbestigasyon sa kapolisan ang biktima nagmaneho sa iyang motorsiklo padulong na pauli ug nagsunod kaniya ang ambulansyang gimaneho ni Derwin Esrera gikan sa syudad sa Danao.
Sumala pa nga mi-overtake ang ambulansya sa nag-unang sakyanan pag-abot sa maong lugar wala damha sa drayber nga masaghiran ang manobela sa motorsiklo sa biktima hinungdan nga misaliring kini.
Tungod kay parehong kusog ang ilang dagan nalagpot sa layo ang biktima nga gibana-banang siyam ka metros gikan sa iyang motorsiklo ug adto mitugpa sa dalan nga nag-una ang ulo.
Daling mihunong si Esrera apan milahos sa iyang paghatud sa pasyente ngadto sa tambalanan sa dakbayan sa Sugbu samtang gipunit sa mga residente si Bingtan ug gidala sa Danao District Hospital apan gideklarar kini nga dead on arrival.
Ang driver sa ambulansya bolontaryong mitahan sa iyang kaugalingon ngadto sa buhatan sa kapolisan sa syudad sa Danao atol sa pagbalik niini. – BANAT NEWS