Toilet bowls ni Gwen gipabantaya'g polis

CEBU, Philippines - Kapin sa 500 ka mga toilet bowls kon inidoro gi-eskortan og mga polis aron lang gyud mahatud sa barangay Baterya sa lungsod sa Daanbantayan human giingong gibabagan ni Mayor Maria Luisa Loot ang unang batch nga iyang gihatag kaniadto.

Si Gob. Gwendolyn Garcia mimando kang Cebu Provincial Police Office director Sr. Supt. Erson Digal nga pabantayan og mga polis ang dump trucks sa Provincial General Services Office aron mahatag niini ang 500 ka mga toilet bowl sa barangay Baterya.

Si Garcia nagkanayon nga gibabagan ni Loot ang unang gihatud nga toilet bowls sa nakalabay nga bulan . Ang kapitan sa maong barangay nga si kapitan Arcenio Luciano gipasuspenso ni Loot ug sa konseho sa lungsod sulod sa 30 ka bulan sugod niadtong bulan sa Nobiyembre sa tuig 2009 tungod sa giingong pasangil sa graft and corruption, abuso sa katungdanan ug uban pa.

Matud pa ni Garcia nga si Luciano na mismo ang misulti kaniya nga ang gihatag sa gobernadora nga toilet bowls wala gyud mahiabot sa ilang barangay kay gieskortan sa kapolisan sa Daanbantayan ug gipabalik sa Kapitolyo kay dili gusto ang mga Loot nga makadawat sa maong hinabang ang mga barangay nga wala mosuporta kaniya.

Ang gobernadora nasagmuyo sa maong sitwasyon hinungdan nga iyang gitawagan si Digal nga kuyogan ang maong mga toilet bowls. Matud pang Garcia nga programa kini sa gobiyerno ug dili angayang babagan sa mga politiko tungod sa politikanhong rason. – BANAT NEWS