CEBU, Philippines - Nabuslot ang paa sa usa ka 54-anyos nga lolo dihang gipusil kini sa silingan niyang 76 anyos nga negosyante didto sa sitio New Era, barangay Mabolo ning dakbayan sa Sugbo sa miaging buntag.
Ang biktima mao si Florente Colina, 54, sa New Era, samtang ang suspetsado mao usab si Ferdinand Nicolas, 76, negosyante nga silingan sa biktima.
Ang biktima misumbong sa kapolisan nga naglakaw siya sa karsada kay naghatod sa 13 anyos nga babaye niyang apo sa eskuylahan dihang kalit lang miduol kaniya ang suspetsado nga nagdala og kutsilyo ug armas de fuego.
Unya sa walay igong hinungdan giluthang ang iyang paa hinungdan sa pagkabuslot niini.
Gihatod dayon ang biktima ngadto sa Perpetual Soccour Hospital, samtang ang suspetsado nagtingkagol na sa prisohan human siya masikop sa kapolisan ug nagpaabot sa tukmang kiha nga isang-at batok kaniya. (BANATNEWS)