SWAT sa Lapulapu alerto kanunay

CEBU, Philippines - Ang SWAT Team sa dakbayan sa Lapulapu kompleto sa mga kagamitan ug training alang sa bisan unsang krisis nga mahitabo, matud pa ni Rolando Duero ug Eric Monsanto sa buhatan sa mayor sa dakbayan sa Lapulapu kagahapon sa buntag.

Sa usa ka press conference gibutyag ni Monsanto nga ang SWAT Team sa Lapulapu adunay mga night vision gaggle, assault rifle ug uban nga napalit sa dakbayan sukad pa sa pahanon ni kanhi Mayor ug karon Kongresista Arturo Radaza.

Giklaro usab ni Monsanto nga matag semana adunay regular nga pagbansaybansay ang mga sakop sa SWAT team sa bisan unsang matang sa krisis nga ilang atubangon.

Samtang si Duero mipadayag nga nasubo ang kagamhanang lokal sa dakbayan sa Lapulapu sa nahitabong hostage didto sa kaulohan nga namatyan og siyam ka kinabuhi.

Giangkon ni Duero nga apektado ang dakbayan sa Lapulapu gumikan kay usa kini sa mga suroyanan sa mga turista ug karong gidid-an na sa kagamhanan sa China ang ilang molupyo sa pagsuroy dinhi sa nasud, hayan nga mokibra usab ang mga turistang mosuroy sa Lapulapu.

Nasayran sa Banat News, ang mga Intsik maoy ika-upat sa pinakadaghang langyaw nga moabot sa Sugbu matag tuig.

Gipasigarbo usab ni Duero nga gihatagan og kasigurohan sa kagamhanan sa dakbayan sa Lapulapu ang kaluwasan sa mga bisita ilabi na sa taga laing nasud ug usa sa kamatuoran niini gitukod ang Tourist Police nga maoy gitahasan sa pagbantay sa tanang turista nga mobisita sa maong lugar. (BANATNEWS)