Opisyal sa Pardo police stn. gireklamo

CEBU, Philippines - Usa ka gwardiya ang mireklamong gipasakitan sa usa ka opisyal nga polis nga kasamtangang nag-Field Training Program nga nadestino diha sa Pardo Police Station niadtong Biyernes sa hapon.

Ang mireklamo diha sa City Internal Affairs Service mao si Florence Patega, taga Upper Cabunayan sa dakbayan sa Talisay kinsa mirepresentar sa medical certificate sa bun-og nga iyang nahiaguman sa mga kamot sa FTP nga opisyal nga si Insp. Enrico Emperwa.

Si Patega mialegar nga nagmaneho siya sa iyang motorsiklo diha sa Natalio Bacalso Avenue sa Bulacao gikan sa Bulacao Community School ug mihapit unta sa pagpalit og pan diha sa may sitio Saint Jude sa samang barangay.

Apan gumikan kay dili man siya maka-left turn milahos lang siya sa unahan ug mi- U-turn apan kalit siyang giduol ni Emperwa nga sakay pud og motorsiklo ug nakasibilyan niadtong tungura ug gibunotan siya niini og armas.

Matud niini nga gisinghagan siya sa maong polis dungan sa pag-ingon “Unsa may gusto nimo? Polis ko!” ug dayong demanda sa iyang lisensya. Sumala pa niya nga sa wala pa niya mahatag ang iyang lisensya usa ka polis nga may name plate nga “Ester” ang mihunong ug mitambag kaniya nga di ipahatag iyang lisensya kang Emperwa tungod kay wala kini mag-uniporme.

Apan giingong namugos gyud si Emperwa dungan sa pagbahad nga kun maabot lang sila sa police station iyaha kining prisuhon ug kulatahon, apan gumikan sa tambag ni “Ester” mikuyog nalang kini sa police station sa Pardo.

Sumala pa sa alegasyon ni Batiga samtang diha sila sa police station kalit siyang gibundakan ni Emperwa sa siko niini sa walang dughan hinungdan nga gisanta kini sa laing polis ug gipahimangnoan nga “ayaw ana sir kay madaot ta ana.”

Pila ka minutos ang milabay giisyuhan siya og temporary operators permit ug gibuhian, apan nianang pagka-Sabado naglisod og ginhawa si Patega hinungdan nga nagpatan-aw kini sa doctor ug dihang gihiling nakit-an ang bun-og sa dughan niini.

Tungod niini, midangop si Patega sa CIAS aron ireklamo si Emperwa. Si Emperwa gipatawag kagahapon ni Sr. Supt. Patrocinio Comendador.

Si Emperwa dihang gikahinabi sa mga tigbalita mihimakak sa pasangil ug miingon nga adunay usa ka traffic enforcer sa maong dapit nga misenyas kanila nga moabante.

Apan giingong kalit nga milabang ang motorsiklo ni Patega maong diriyot siya niini mabanggai hinungdan nga iyang gisitar apan mihimakak siyang gibunotan niya kini og armas ug gibundakan og siko.

“So ako siya gitawag, ‘Dong, unsa man ‘tong imo gibuhat? Di man ‘to maayo. Nangayo ko sa iyang lisensya. Giingnan pa gyud ko, “ngano diay,polis ka? ‘Nya bugal-bugalan pa gyud ta paghatag sa iyang lisensya. Maong nangadto mi sa police station,” matud pang Emperwa sa media.  (BANATNEWS)