Balili executor: Di obligadong mo-refund sa P30 milyones sa kapitolyo

CEBU, Philippines - Ang abogado sa pamilyang Balili nagdumili sa pagsanong sa demanda sa Kapitolyo nga ibalik ang kapin sa P30 milyones nga gibayad sa   kontrobersyal nga lote nga giingong maoy nalubog sa tubig dagat ug kabakhawan.

 Matud pa ni Balili estate executor Atty. Romeo Balili sa gipahigayon nga pre-trial conference kagahapon sa sala ni RTC 7 Branch 14 Judge Rafael Yrastorza nga dili obligado ang pamilyang Balili nga mo-refund sa Kapitolyo og P30 milyones.

Ang maong kantidad kabahin sa kapin sa P97 milyones nga gibayad sa Kapitolyo sa pagpalit sa dul-an sa 25 ka ektaryang lote sa mga Balili diha sa barangay Tinaan dakbayan sa Naga.

 Sumala pa ni Balili nga nasayop ang Kapitolyo sa pagtumbok sa bahin sa lote nga gihimong fishpond nga usa ka submerge sanglit gigamit man kini sa commercial nga katuyuan.

 Apan sa iyang bahin si Provincial Atty. Mariano Martinquilla miingon nga dili mahitabong masayop ang posisyon sa Kapitolyo tungod kay gitarong kini og survey.

Si Martinquilla mitumbok nga ang Kapitolyo mopresentar sa mga  geodetic engineers nga maoy nag-survey sa maong lote nga miingong nalubog gyud sa tubig ug kabakhawan ang pipila ka bahin sa maong lote.

 Kini maoy pamatud-an unya sa probinsiya aron mabalik ang refund nga ilang gipangayo.  (BANATNEWS)