HK miisyo'g travel ban vs Pilipinas

CEBU, Philippines - Human sa nahitabong hostage crisis ngadto sa Manila diin walo ka turista ang namatay, ang kagamhanan sa Hong Kong miluwat og “black” travel alert sa Pilipinas diin gikanselar sa tour groups ang tanang gi-organize nga pagbisita nganhi sa nasud.

Giisa ubos sa half-mass ang tanang bandila ngadto sa mga government building sa Hong Kong isip respeto sa mga biktima sa pagpang-hostage niadtong Lunes.

Base sa report sa ABS-CBN si Donald Tsang, chief executive sa Hong Kong nagpakita sa iyang kasagmuyo sa hitabo.

Kahinumduman nga si kanhi Sr. Insp. Rolando Mendoza kinsa armado og M-16 rifle ang mi-hijack sa usa ka tourist bus diin sakay niini ang 25 ka mga tawo.

Si Chinese Foreign Minister Yang Jiechi mipakita sa pagkakugang sa hitabo ug mimando kini og halapad nga imbestigasyon.

“We strongly request the Philippine and Chinese governments to investigate and give satisfactory answers to Hong Kong people,” matud niini ngadto sa Apple Daily, base sa report sa ABS-CBN.

Gikwestiyon usab ang kataas sa panahon sa ilang pag-interbener sa hitabo.

Ang embahada sa US ngadto sa Manila mikondenar sa nahitabong pagpang-hostage.

Ang embahada sa US nagkanayon nga bisan og ang hitabo wala magpakita sa lakang nga terorismo apan ang pagkakalas sa mga inosenteng kinabuhi nakapasubo sa tanan.

Si US Ambassador Harry K. Thomas Jr. nagkanayon “throughout this long day, our thoughts and prayers have been with the hostages on a tour bus by an individual alleged to be a former member of Philippine National Police. On behalf of my American and Filipino colleagues at the US Embassy, I offer my heartfelt condolences to the victims if this horrific incident. We condemn this heinous act; there is no justification for harming innocent people.”

Human sa hostage crisis sa Rizal Park niadtong Lunes gikataho nga walay security threats o mga hulga sa seguridad sa Filipino community ngadto sa Hong Kong.

Sa gibating kasuko ug kasagmuyo karon sa Chinese community sa Hong Kong, kagahapon si Consul General Claro Cristobal nagkanayon nga wala sila makadawat og bisan unsa nga security threats o hulga sa ilang pagkabutang ngadto sa Hong Kong.

Karon dunay 152,000 ka mga Filipino ngadto sa kanhi colony sa Britanya nga karon usa sa mga China’s Special Administrative Regions.

Base sa ulahing ihap sa consulate, 133,000 nga tua sa Hong Kong mga domestic workers ug mokabat ngadto sa 14,000 ang Hong Kong-based Filipino professionals ug dunay mga temporary residents usab.  (BANATNEWS)