CEBU, Philippines - Problema sa kakuwang sa mga higdaanan diha sa Cebu City Medical Center gumikan sa pagsugwak sa gidaghanon sa mga pasyenteng nataptan og sakit nga dengue ug pneumonia gisolusyonan.
Tungod sa nagkataas nga gidaghanon sa mga kaso sa dengue ang mga katre diha sa CCMC nagnihit tungod kay sa matag usa ka katre duha ngadto sa tulo ka pasyente ang magtupad.
Sa pakighinabi sa mga tigbalita ngadto kang City Mayor Michael Rama diha sa iyang buhatan kagahapon sa buntag nagkanayon nga dili problema ang kakulang sa hospital beds kundili ang lawak o espasyong kabutangan niini.
Base sa record adunay 35 ka hospital beds nga napuno na karon og pasyente ug padayong nagsugwak ang pag-abot sa mga pasyenteng adunay sakit nga pneumonia ug gidudahang sakit nga dengue.
Ang mayor personal nga mibisita kagahapon sa maong tambalanan mimando kang CCMC administrator Myrna Go sa pagpangita og pamaaging madugangan pa ang hospital beds sa maong tambalanan.
Si Rama mimandong ipagamit na ang auditorium ug extension wards aron mas daghan pang pasyenteng madawat ang CCMC. (BANATNEWS)