Sikyu patay sa kuryente

CEBU, Philippines - Patay ang usa ka guwardiya human nakuryentihan pasado alas 5 sa hapon sulod sa Visayan Memorial Park sa sitio Canbuntan, barangay Bolinawan, siyudad sa Carcar.

Ang biktima nailhan nga si Maximo Villordon, 33, molupyo sa sitio Punta Can-asuhan sa maong siyudad.

Sa pakighinabi sa Banat News ni SPO1 Rey Fuentes sa Carcar Police Station mibutyag kini nga sa wala pa mahitabo ang pagkakuryente sa biktima aduna kini giayo nga usa ka extension wire.

Samtang na-g-ayo kini, kalit lang nga nagkirig-kirig ang biktima ug natumba nga miresulta sa pagkatingala sa mga tawo nga nangagi. Tungod niini, adunay mitawag sa buhatan sa kapolisan ug nangayo og pakitabang.

Naabtan sa kapolisan ang biktima nga nagbuy-od na ug wala nay kinabuhi apan ila gihapon kining gidala sa Carcar City District Hospital sa pagtuo nga maluwas pa.

Apan gideklarar kini nga dead on arrival sa doktor sa maong tambalanan.

Dako ang pagduda ni Fuentes nga didto nagkuha og kuryente sa mainline ang biktima ug posibleng nakahikap kini og live wire nga miresulta sa iyang hinanaling kamatayon.  (BANATNEWS)