Piniriso gikulata kay di mosayaw

CEBU, Philippines - Giingong nawad-an na og interes ang mga dancing inmates sa Cebu Provincial Detention and Rehabilitation Center (CPDRC) pagsalmot sa sayaw hinungdan nga gihimo na kini karong pinugsanay ug kulatahun na kadtong magdumili pag-apil sa sayaw.

Mao kini gibutyag sa gitaktak nga kanhi Capitol consultant Byron Garcia subay usab sa nahipos niyang impormasiyon sa iyang mga kontak sulod sa bilanggoan.

Gitumbok ni Byron ang piniriso nga nailhan niyang si Leo Suico nga nakonbikto og double life imprisonment apan gipugngang dili mabalhin sa National Bilibid Prison sa Muntinlupa aron maoy mamun-og sa mga dancing inmates nga dili na mosalmot sa ilang regular nga practice. Dugang ni Byron nga iyang gihinabi si CPDRC jail warden Alito Gabuya ug walay laing ibalikbalik og tubag niini nga “kamanduan kini ni Gob. Gwen Garcia.” Gihimong sanglitanan ni Byron ang pagkamatay sa kulata sa piniriso nga si Angelito Cabalquinto sa milabay’ng semana ingon man ang pagkabun-og sa laing piniriso nga si Benjie Undet. Si Cabalquinto nahimo nang lay minister sa CPDRC.

Si Byron nagkanayon nga gitagotago lang sa kadagkoan sa CPDRC ang kahimtang sa mga nabun-og sa maong bilanggoan.

Gani giawhag ni Byron ang kabanay ni Undet sa lungsod sa Balamban sa pagbisita ug pagsusi sa ilang kaliwat nga piniriso mentras dili pa ulahi ang tanan.

Dugang ni Byron nga sukad siya gitaktak sa iyang igsuon nga gobernadora pagdumala sa CPDRC daghan usab sa mga dancing inmates ang wala na ganahi pagsalmot tungod kay gipang-usab ang mga patakaran niini. Gani gitug-an ni Byron nga ang namatay nga si Cabalquinto mibadlong kini sa dili pagmaltrato sa mga piniriso nga dili na ganahang mosalmot sa sayaw, apan paglabay sa duha ka adlaw nahitabo dayon ang pagkulata niya hangtod namatay.

Usa sa gitumbok ni Byron mao ang pag-usab sa regular nga oras sa praktis matag alas 6 sa buntag kaniadto nga gihimo karong alas 4 sa kaadlawon “aron makalusot ang mga ipayuhot nga shabu, ilimnong makahubog ug uban pang kontrabando sa maong bilanggoan.”

Si Byron hugtanong mihimakak sa pasangil nga pagbulsa niya sa minilyon nga donasyon sa na-popular nang dancing inmates hinungdan nga gitaktak kini sa iyang igsuong si Gob. Garcia isip capitol consultant. Matud niya moagi sa buhatan sa gobernadora ang tanang donasyon ug kontribusyon alang sa mga dancing inmates.

Si Gob. Garcia sa iyang bahin nagkanayon nga gisugdan na kagahapong adlawa ang imbestigasyon kalabot sa namatay ug nabun-og nga piniriso tungod sa pagpangulata tungod sa pagdumili pag-apil sa sayaw.

Ang investigating team nga gi-umol gipangulohan ni Atty. Lito Astillero, ang pangulo sa Committee on Discipline and Investigation.

Inspeksiyonon sa investigating team ang mga pasilidades sa CPDRC ug makighinabi usab sa mga piniriso ug mga jail guards kalabot sa kamatayon sa duha ka mga inmates.

Si Gob. Garcia nagdumili sa pagtubag sa pasangil sa iyang manghod nga si Byron.

Ang gobernadora mimando sa pagpahigayon og autopsy sa duha ka mga piniriso nga namatay kun tinuod ba nga gipangulata hinungdan sa kamatayon niini.

Samtang ang Commission on Human Rights mopahigayon og motu propio investigation kalabot sa maong insidente, sumala pa ni CHR-7 legal officer Atty. Arvin Odron. (BANATNEWS)