Opisyal sa PNP nang-hostage og 25 turista, 3 ka Pinoy

CEBU, Philippines - Usa ka gitaktak nga opisyal nga polis ang mi-hostage sa 25 ka mga turista ug tulo ka Filipino nga sakay sa usa ka tourist bus diha sa Quirino Grandstand sa Rizal Park, Manila kagahapon nga miabot kagabii.

Ang nang-hostage mao si Sr. Insp. Rolando del Rosario Mendoza kinsa giingong gitaktak pagkapolis tungod sa kasong harassment ug extortion. Si Mendoza kanhi nadestino sa Manila Police District gi-dismiss niadtong 2009 tungod sa maong kaso.

Gibuhian hinuon sa maong suspek ang photographer nga si Danilo Medril, 65, ug laing walo ka mga hostages nga naglakip sa mga bata atol sa gihimong negosasyon nila ni Supt. Orlando Yebra Jr. ug Chief Inspector Romeo Salvador.

Sa report sa ABS-CBN News, si Director Leocadio Santiago sa National Capital Region Police Office (NCRPO) mibutyag nga midemanda si Mendoza nga mabalik sa serbisyo ug makighinabi sa media. Sayo pa niana, mipasalig ang kapolisan nga uwahi na nilang gamiton ang pwersa pagresolbar sa maong krisis, apan kagabii atol sa pagbunok sa uwan gisuwayan sa pagsulod sa mga polis ang bus apan mibawos og pabuto ang suspek sa sulod hangtud nga naigo sa mga snipers si Mendoza.

Pipila ka minutos ang milabay human sa buto-buto samtang napuot sa aso sa tear gas ang bus adunay usa ka batang babaye ang gikuha sa polis gikan sa luyong bahin sa bus. Upat ka hostage ang naluwas.

Atol sa binayloay sa bala, aduna pay 15 ka hostages sa sulod sa maong bus.

Base sa video footage sa GMA News nga mikober kagabii, dunay usa ka patay’ng lalaki diha sa hagdanan sa pultahan sa maong bus.

Sa wala pa kini mahitabo, pipila ka buto sa armas ang nadungog lakip na niini ang automatic burst nga giingong gikan sa sulod sa bus ug usa ka batan-on nga nanguryuso ang naigo sa saag nga bala.

Alas-9 sa buntag, si Mendoza misakay sa Hong Thai Tours nga may sakay nga 22 ka Chinese ug tulo ka Filipino nga mao ang drayber, photographer ug interpreter diha sa Fort Santiago nga padulong unta sa Ocean Park.

Gikatahong armado si Mendoza og M-16 rifle ug mubo nga armas.

Unang gibuhian ni Mendoza ang duha ka Chinese human sila mohangyong mangasilyas. Nianang pagka-udto gibuhian usab niya ang upat ka Chinese lakip na ang tulo ka bata ug alalay, nianang pagkahapon gibuhian usab ang usa ka tiguwang lalaki.

Gawas kang Nebril, ang gibuhiang hostages sayo kagahapon mao sila si Li Fung Kwan, Tsang Yee Lai, 4, Fu Chung Yin, 10, Fu Chak Yin, 11, Wong Ching Yat Jason, 73, Li Yick Biu, Rigor Cruz ug usa ka wala hinganling Filipino.

Si Mendoza ug upat ka kaubang polis gikiha og robbery, robbery-extortion, grave threats ug physical injuries ni Christian Kalaw nga miresulta sa rekomendasyon sa Office of the Ombudsman pag-dismiss kanila sa serbisyo niadtong 2009. Ang igsuon ni Mendoza nga si SPO2 Gregorio Mendoza, sakop gihapon sa MPD gidakop kagahapon sa mga polis ug gipasanginlang accessory sa krimen apan nahimo kining tensyonado tungod sa pagbabag sa mga kabanay.

Pila ka minutos human sa pag-aresto sa igsuon ni Mendoza mipaka-paka ang buto sa sulod sa bus ug nisunod na ang pag-atake sa mga polis. Makadaghang higayon misuway og sulod ang mga polis apan kanunay silang moatras gumikan sa kalisod nga makasulod.

Gidudahang adunay tv monitor sa sulod sa maong bus ug posibleng nakit-an niini ang gibuhat sa mga polis sa iyang igsuon.

Ang maong hostage taker gipasidunggan kaniadto og 1986 Ten Most Outstanding Policemen of the Philippines (TOPP) sa Jaycees International. Pulos professional ang tulo ka anak ni Mendoza nga usa ka seaman, usa ka polis ug ang anak nga babaye mitapos sa kolehiyo nga cum laude. (BANATNEWS)