Kawani sa kapitolyo nakuryentihan patay

CEBU, Philippines - Patay ang usa ka drayber sa Kapitolyo human kini nakuryentihan samtang nagtaud og fluorescent bulb sa ilang kapilya pasado alas tres sa hapon sa barangay Poblacion lungsod sa Badian.

Ang biktima nailhan nga si Manuel Samontanez, 48, molupyo sa maong lugar, ug usa ka drayber sa Kapitolyo apan giingong lehirong manaod og suga sa ilang lugar.

Base sa imbestigasyon sa kapolisan sa Badian nasayran nga ang biktima nagtaud og suga sulod sa San Roque Chapel human kini giingong miboluntaryong maoy mutaod niini.

Apan samtang nagkupot kini sa pliers ug padulong moputol sa usa ka wire aksidenteng nakuptan niini ang usa ka live wire hinungdan sa pagkirig-kirig niini ug nahagba.

Tungod niini, usa sa mga nakasaksi sa maong hitabo ang daling mitawag sa kapolisan aron mangayo og tabang apan dihang gidala kini sa Badian District Hospital gideklarar kining dead on arrival.

Sa pakighinabi sa Banat News ni PO1 Randy Balansag mibutyag kini nga ang namatay ilado na sa ilang lugar nga nasuhito sa pagpanaod og suga sanglit giingong aduna kini kasinatian isip usa ka electrician. (BANAT)