Eskuwater sa DA compound di na papahawaon sa gobernador

CEBU, Philippines - Ang kagamhanan sa lalawigan sa Sugbo mipasalig nga dili na hilabtan ang mga eskuwater sa sulod sa compound sa Department of Agriculture (DA) sa may M. Velez Street ning siyudad sa Sugbo bisan pa man og napupos na ang giluwatang Temporary Restraining Order (TRO) sa korte batok sa Kapitolyo, sumala kang Provincial Atty. Mariano Martinquilla.

Matud pa ni Martinquilla nga si Gobernador Gwen Garcia miduyog sa mando sa hukmanan nga dili una papahawaon ang mga namuyo sa sulod sa DA compound.

Apan gitataw ni Martinquilla nga ang Kapitolyo mopadayon sa pag-ugmad ug paggamit sa lote sa DA, samtang ang gipuy-an sa mga eskuwater dili pahilabtan kay nagpadayon pa ang kaso sa korte.

Sa iyang bahin si Garcia miklaro nga dili gub-on sa Kapitolyo ang mga imprastraktura nga gibiyaan sa DA sanglit magamit pa kini sa Provincial Engineering Office.

Matud pa sa gobernadora nga dili angayan nga mabalaka ang mga eskuwater   tungod kay wala sa iyang batasan ug sa iyang record nga mogamit og binangis ug sinalbahis nga paagi sa pagpapahawa sa mga eskuwater sa lote sa kagamhanan sa lalawigan sa Sugbo sulod sa unom niya ka tuig nga pagdumala sa probinsiya.

Sigun pa sa gobernadora nga ipaagi kini niya sa minaayong sabotsabot sama sa iyang gihimo sa nag-ukopa sa 93-1.

Dugang pa sa gobernadora nga dili na lamang unta sakyan ang maong isyu sa pamolitika sa siyudad sa Sugbo aron dili mosamot kadako ang kabalaka sa mga nagpuyo sa DA compound. (BANAT)