CEBU, Philippines - Kritikal ang kahimtang sa usa ka lalaki human mapantok sa karsada niini dihang nadat-ugan siya sa iyang nadiskarel nga motorsiklo didto sa national road sa barangay Poblacion, syudad sa Danao, sa miaging adlaw. Ang biktima nailhan nga si Bonifacio Batucan Cuizon, 62, nga taga barangay Donguan, sa maong dakbayan.
Nasayran sa kapolisan nga ang biktima paatubang ngadto sa habagatang bahin sa Danao sakay sa iyang Kawasaki nga motorsiklo nga adunay plakang GH-6405.
Apan sa pag-abot niya sa national road kalit lang nga natangtang ang kadena sa iyang motorsiklo busa nawad-an siya og control niini hangtod nga misaliring sa karsada ang sakyanan ug ang biktima kinsa nadat-ugan sa iyang sakyanan, napantok ang ulo sa karsada.
Ang biktima nga nakaangkon og daghang samad sa lawas ug ulo, uban sa mga bali sa kalawasan, dali nga gidala ngadto sa Danao City District Hospital apan gibalhin ra usab kini sa usa sa mga tambalanan sa syudad sa Sugbo. (BANAT)