Mga hulagway ni Arroyo ipatangtang

CEBU, Philippines - Gitinguha ni kanhi Senador John “Sony” Osmeña nga matangtang ang tanang mga ngalan ug hulagway ni kanhi presidente Gloria Macapagal Arroyo nga gipapilit sa mga proyekto sa nasudnong kagamhanan sa mga kalungsoran sa lalawigan sa Sugbo ilabina kun katapad kini sa ngalan ug hulagway ni Gobernador Gwen Garcia.

Sa interview sa DyRF si Osmena nagkanayon nga bisan og gimando na ni Presidente Benigno Noynoy Aquino nga ipalaksi ang mga ngalan ug   hulagway sa mga politiko nga anaa sa mga proyektong lokal ug nasyonal, apan nagpabilin gihapon ang dagway ni Arroyo sa mga lungsod sa habagatang bahin sa lalawigan sa Sugbo.

Tungod niini si Osmeña nagkanayon nga iya unyang tawagan si Kalihim Rogelio Singson sa Department of Public Works and Highways (DPWH) aron hangyoon nga ipatangtang na ang mga billboard nga may dagway ni Arroyo.

Gipasabot sa kanhi senador nga dako siyang uyon sa balaod nga gipanday karon ni Senador Chiz Escudero nga idili na ang pagpapilit sa mga ngalan ug dagway sa politiko sa gipatukod niining mga proyekto kay dili man kwarta sa politiko ang gigamit sa maong mga proyekto kundili buhis sa   katawhan.

Dili motuo si Osmeña sa baruganan sa mga Garcia nga dili mahimong dili mapahibawo ang katawhan bahin sa mga politiko nga naningkamot sa pagpatukod og proyekto.

Kini tungod kay matud pa sa kanhi senador nga nahimo kini niya sulod sa 40 ka tuig nga pagserbisyo sa gobyerno nga wala magpapilit sa iyang ngalan ug dagway sa dili na maihap nga mga proyektong napatukod niya sa nagkalainlaing dapit sa nasud. (BANAT)