Pangarnap sa motorsiklo misiaw

CEBU, Philippines - Padayong gipanid-an karon sa kapolisan ang mga carnapper og motorsiklo nga mibiktima og duha ka tawo sulod lamang ning semanaha sa nagkalainlaing lugar ning dakbayan sa Sugbo.

Ang gikawatan og motorsiklong Honda XRM 125 cc nga itom ang kolor kagahapon sa buntag mao si Raul Relativo, 31, nga taga sitio Banawa, barangay Guadalupe, samtang si Diosdao Borres , 39, minyo , nga taga barangay Bonbon, nawad-an sa iyang motor sa miaging adlaw.

Si Relativo kinsa nagtibi nga misumbong sa kapolisan nagkanayon nga giparking niya ang iyang motor sa daplin sa karsada didto Banawa kagahapon sa buntag kay aduna siya’y gipalit.

Apan sa iyang pagbalik wala na ang iyang sakyanan ug walay nakabutyag kaniya kun kinsa ang mikawat niini.

Samtang si Borres mitug-an usab sa kapolisan nga iyang giparking ang iyang sakyanan didto sa ilang barangay samtang siya uban sa iyang asawa nakighinabi sa ilang mga silingan ug higala.

Pagbalik pa nila sa ilang gibinlan sa ilang sakayanan nawala na kini ug walay nakasaksi kun si kinsa ang misakiyo sa maong sakyanan.

Ang kapolisan nakamatikod nga gawas nga gigamit sa panulis, ug pagpatay ang mga motorsiklo karong panahona, mikusog na usab pagpangarnap ning tagduhay ligid nga sakyanan. (BANAT)