Reklamo vs. ex-mayor ug 5 kapitan gibasura

CEBU, Philippines - Gibasura sa Ombudsman Visayas ang kasong giduso sa municipal engineer sa lungsod sa Minglanilla batok sa kanhi mayor ug sa lima ka mga kapitan sa mga barangay sa nahisgutang lungsod.

Si Engineer Sotes miduso og kasong falsification of public documents, malversation of public funds, ug illegal use of public funds or property batok ni kanhi mayor Marlo Cañada, Rafael Briz, kapitan sa barangay Pakigne, Lamberto Cañada, kapitan sa barangay Tulay, Samuel Sedano, kapitan sa barangay Calajoan, Catalino Largo, kapitan sa barangay Camp 7 ug Margarita Batugan kapitan sa barangay Guindarohan.

Ang nahisgutang kaso giduso niadtong tuig 2005 ug na-dismiss niadtong Agosto 24, 2009 apan nasuta sa Ombudsman Visayas nga walay probable cause ang nahisgutang kaso nga giduso batok sa kanhi mayor ug lima ka kapitan.

Ang kopya sa maong desisyon niadtong unang semana niining buwana lang nadawat sa kanhi mayor sa Minglanilla nag-ingon nga si Sotes namahayag nga ang lungsod mipalit og mga sinakong semento alang sa Candulawan-Tunghaan Farm to Market Circumferential Road niadtong tuig 1998-2001.

Ang budget sa maong mga semento naggikan sa Countrywide Development Funds ni Kongresista Eduardo Gullas sa unang distrito.

Ang mga semento nagkantidad og P130 kada bag gibutang sa bodega diha sa munisipyo.

Si Sotes mipasangil nga ang kanhi mayor nga si Cañada migamit ug mi-release sa maong mga semento nga dunay gidaghanon nga 2, 925 nga balor og P380,250 aron gamiton ngadto sa laing proyekto.

Si Sotes mipasangil nga sa iyang gihimong inspeksyon wala kaabot sa maong gidaghanon sa semento ang nahimong proyekto ni Cañada ug ang sobra sa maong mga semento ang giingong gigamit sa kanhi mayor ug sa mga barangay kapitan alang sa ilang personal nga katuyoan.

Sa imbestigasyon sa buhatan sa Ombudsman nasuta nga ang lungsod walay gigamang ordinansa alang sa maong mga semento nga kini alang lamang sa Candulawan-Tunghaan Farm to Market Circumferential Road ug bisan gani ang treasurer’s office wala makahibalo kun sobra ba o dili ang maong semento alang sa proyektong gikwestyon ni Sotes.

Sa maong sitwasyon ang kasong giduso ni Sotes batok sa nahisgutang mga opisyal ang dili makabarog o dili lig-on hinungdan nga na-dismiss ang maong kaso.

Si Cañada nga nahinabi sa mga tigbalita nagkanayon nga ang nahisgutang mga semento migahi na diha sa bodega dihang siya maoy milingkod nga mayor sa lungsod hinungdan nga iyaha kining giapud-apod ngadto sa maong mga kapitan aron mapahimuslan.

Ang maong mga semento gigamit pagtukod og duha ka reservoir ug mga foot path.

Kahinumduman nga si Cañada wala mahatagi sa iyang terminal leave benefits bisan og nakasumitir na kini sa iyang mga rekisitos ngadto sa hingtungdan nga mga buhatan sa lungsod ug hinungdan nga midangop kini sa Ombudsman Visayas.

Ang Ombudsman Visayas miluwat og kamanduan sa pagsuspenso kang Sotes sulod sa tulo ka buwan tungod sa simple neglect of duty tungod kay nasuta nga napakyas kini pagtuman sa iyang obligasyon isip municipal engineer. (BANAT)