Lola natulisan og P10 mil

CEBU, Philippines - Nasakiyo sa mga tulisan ang Pl0 mil kapin ug ubang mga butang gikan sa usa ka 60-anyos nga ginang didto sa atbang sa Vicente Sotto Memorial Medical Center ning dakbayan sa Sugbo kagahapon sa alas 9:00 sa buntag.

Ang biktima mao si Gloria Galera, 60, nga taga Andres Abellana, ning dakbayan, samtang ang mga tulisang wala hiilhi nagsakay og usa ka motorsiklo.

Si PO3 Jomar Viscara sa Fuente Police Station mibutyag sa Banat News nga samtang naglakaw ang biktima, kalit lang kining gihunongan sa usa ka motorsiklo nga gisakyan sa tulo ka tawo ug usa kanila ang nanaog ug mition kaniya og usa ka butang nga wala niya hisayri kun pusil ba o kutsilyo.

Tungod sa iyang kahadlok wala na siya motan-aw kun unsay gition kaniya, sumala sa iyang gibutyag sa kapolisan.

Nasakiyo sa mga tulisan ang bag sa biktima nga may sulod nga drivers license, medical ID ug cash nga P10,200.

Human makuha ang bag, misirit dayon ang mga tulisan pahilayo sa maong lugar ug gipangita pa karon sa kapolisan. (BANAT)