CEBU, Philippines - Patay nang naabtan sa caretaker ang usa ka lalaki nga nag-abang sa ilang balay sa dalan D. Jakosalem sa barangay Kamagayan ning dakbayan sa Sugbo kagahapon sa kaadlawon.
Ang biktima nailhan nga si Rogelio Garcia, hingkod, nga nagpuyo sa maong lugar apan lumad nga taga barangay Mabini ning dakbayan.
Si Nancy Moreno, kinsa maoy mitaho sa kapolisan nagkanayon nga nakamata siya kagahapon sa kadlawon tungod sa kalanog sa ubo sa biktima unya dihang nahilom kini, migawas siya sa iyang lawak ug mao nalay iyang nakita nga naghapla na sa sawog ang biktima nga wala nay kinabuhi.
Gisusi dayon sa kapolisan ang lawas sa biktima ug wala silay nakita nga timaan nga kini gituyo sa pagpatay.
May gisi sa iyang kilay nga gituohang maoy nasabak sa baldusang semento sa iyang pagkatumba. (BANAT)