Mabdos gipriso kay mikulata sa 4-anyos anak

CEBU, Philippines - Gidakop sa mga polis ug gibalhog sa sulod sa detention cell ang usa ka 22-anyos nga inahan nga walo ka bulang mabdos tungod sa pagpangulata niini sa iyang 4- anyos nga anak nga giingong mimolestiya sa 4-anyos usab niining ig-agaw’ng babaye diha sa usa sa mga barangay sa lungsod sa Cordova.

Si PO2 Calixto Botantan nga maoy imbestigador sa nahisgutang kuwerpo sa kapolisan miingon nga midangop kanila ug nangayo og tabang ang apohan sa biktima gumikan sa gihimo sa inahan diha sa iyang apo.

Sumala pa nga pwerteng sukoa sa suspek human niya masayring gimolestiya sa iyang anak nga lalaki (biktima) ang ig-agaw niining batang babaye diha sa luyo sa barangay hall.

Apan ang batang babaye misumbong sa inahan niini hinungdan nga ang naulahi daling mipahibalo sa suspek hinungdan sa kasuko niini ug mikuha og silhig nga lanot ug gibunalbunalan ang biktima.

Sumala pa sa mga nakasaksi bisan asang dapita sa parte sa lawas maigo ang bata lakip na niini ang abaga, nawong, bukobuko ug uban pa hinungdan sa paghuboy sa nawong niini ug pagkabun-og sa kalawasan.

Tungod sa kagrabe sa gibuhat sa suspek wala makaagwanta ang apohan sa bata ug mitawag sa kapolisan.

Nagtuo ang kapolisan nga ang biktima nakuryoso lamang ug posibleng nakakita kini og malaw-ay’ng salida o ba kaha nakakita og mga tawong mihimo niini ug gisundog.

Si Botantan miingon nga gidala sa tambalanan sa Lapulapu District Hospital ang biktima ug padayon kining giatiman sa mga doktor.

Dugang pa ni Botantan nga ilang gitugyan ang maong bata ngadto sa Municipal Social Welfare and Development Office (MSWDO) alang sa tukmang lakang nga ilang pagahimuon sa maong insidente. (BANAT)