Mabano mikisikisi sa pasangil

CEBU, Philippines - Si Kapitan Eddie Mabano sa barangay Kalunasan ning dakbayan sa Sugbo mihimakak kagahapon sa mga akusasyon nga gi-over praysan ug sub-standard pa ang proyekto nga riprapping sa iyang barangay.

Matud pa ni Mabano nga gigamitan og bato ug dagkong mga alambre ang riprap didto sa sitio Lahera ug sitio Lokana kay maoy nahimutangan sa program of works and estimate (POWE) ug kini ang labing epiktibong paagi sa riprapping nga dili na kinahanglan nga sementohon aron nga makalusotlusot lang ang tubig ug dili mabungkag ang riprap.

Busa matud pa ni Mabano nga hungaw kaayo ang pasangil ni konsehal Nunilon Monares kay wala kini basehanan.

Sayo niini gibutyag ni Monares nga wala kuno magsubay sa POWE ang maong mga proyekto busa alang kaniya may nahitabong over pricing ug sub-standard ang maong mga proyekto.

Apan matud pa ni Mabano misipyat lang si Monares   sa iyang akusasyon. – BANAT NEWS