RA 9344 ni Pangilinan ipaamendar sa 2 mayor

CEBU, Philippines - Balaod ni Sen. Francisco ‘Kiko’ Pangilinan nga RA 9344 kun Juvenile Justice System Law of 2006 buot ipaamendar nila ni Lapulapu City Mayor Paz Radaza ug Mandaue City Mayor Jonas Cortes gumikan kay nahimo na hinungdan nga midaghan ang mga krimeng may kalambigitan sa kabataan.

Si Radaza nagkanayon nga dakong babag ang RA 9344 sa ilang ordinansa sa paghipos sa mga kabataan sa lawom na nga kagabhion pinaagi sa ilang curfew ordinance nga gipatuman.

Kasagaran sa mga kabataan nga nalambigit sa krimen ilabi na kadtong adunay gisudlang fraternity ug gangs ug kung kini ilang masikop human malambigit sa krimen dili kini mabilango gumikan sa maong balaod.

Samtang si Mayor Cortes sa iyang bahin nagkanayon nga gihagoan og maayo sa kapolisan ang pagmentinar sa kahapsay ug kalinaw apan kun diha sila magkalisod kun ang nalambigit sa krimen mga batan-on.

Gumikan niini ang duha ka Mayor misugyot ngadto sa ilang mga Kongresista sa matag distrito sa paghimo og lakang sa pag-amendar sa RA 9344 sa hawanan sa Kongreso.  – BANAT NEWS